KUCHING , 17 Jun : Raban media nyadi siti pelantar ti chukup bekuasa sereta ngembuan tangkup pengawa ti besai ba pemansang politik.
Pia ku Sapit Premier Sarawak, Datuk Amar Douglas Uggah Embas madah lebuh bejaku ba Gempuru Besai Raban Nembiak Parti Pesaka Bumiputera Bersatu (PBB) di Palan Konvensyen Borneo Kuching (BCCK) lebuh Hari Lima.
Ku Uggah ke mega Kaban Kunsil Negeri (ADUN) Bukit Saban madah, media rama tu nyadi pelantar ke chukup beguna ba dalam bidang politik.
Ambika banding, pekara tu nyata amat dipeda lebuh Pengawa Bepilih Negeri (PRN) ti ke 14 ke udah, ke alai Perintah Besai (BN) labuh ketegal Pakatan Harapan (PH) ti ngembuan raban media tauka pengarang berita ke tegap rambau PRU14 ba taun 2018 ke udah.
Nya alai Uggah ke nyadi Sapit Yang Dipetua Parti PBB ngelalau mensia mayuh ngambika seruran nyikap diri enggau penemu ti bekaul enggau pengerembai berita ti pemadu baru sereta nyendiaka raban media ti tegap.
“ Tu tau nulung, tau ngidup, tau kena meli barang, tau ngenusah kitai. Kitai udah meda ba taun 2018, Barisan Nasional labuh ketegal media rama. Kitai mega meda di serata dunya, presiden menang enggau kalah ketegal media rama”,
“ SUPP menang ketegal media rama nya alai, aku ngarapka tebal agi raban nembiak indu enggau raban nembiak lelaki PBB nyikap diri enggau teknologi ti pemadu baru,” Ku Uggah madag agi.
Berindik ari nya, iya meransang tetiap iku kaban PBB ulih ngetanka diri , parti enggau perintah GPS sereta mansutka buah penemu enggau pekara politik ke ukai semina di luar tang mega ba dalam dunya siber.
