TARAT: Pemansang ti dibai perintah Sarawak iya nya perintah Gabungan Parti Sarawak (GPS) mayuh meri pemaik ngagai peranak menua pesisir.
Ngambi ripot ari UKAS, Menteri Betanam Betupi Moden, Tanah Adat enggau Pemansang Kandang Menua Sarawak ke mega Kaban Kunsil Nengeri (ADUN) Tarat, Datuk Roland Sagah Wee Inn ngelalau peranak deka terus nyukung perintah GPS ngambika pemansang ulih terus bejarit dipejalaika.
Iya bejaku munyi nya maya ba Simbolik Pengawa Ngangkatka Pemanah Tikas Chapel St. Vincent De Paul, Kampung Chupak maya hari minggu.
Terang iya, semua pemansang nya dibai perintah nengeri nengah ungkup Projek Transformasyen Menua Pesisir (RTP), Projek Mit Menua Pesisir (MRP) enggau Unit Pekara Pengarap Bukai (UNIFOR).
