KUCHING, 15 Jun: Gerempung Ukai Dikuasa Perintah (NGO) Dayak di Sarawak diperansang nyukung enggau ngerembaika program ti dipejalaika perintah nengeri.
Sapit Premier Sarawak, Datuk Amar Douglas Uggah Embas madahka, tu berindik ari raban NGO suah ngatur program ke ngaul komuniti, tebal agi di kandang menua pesisir nerangka polisi enggau Strategi Pemansang Pasca COVID-19 (PCDS) 2030.
“Nyadi tu meh utai ke chukup manah lebih agi kitai di Sarawak ke nyadi chunto nengeri bukai di Malaysia.
“Penyerakup di Sarawak iya nya nyadi kelai mandangka gaya idup rayat di nengeri tu. Kitai semua ulih begulai, sejalai, saum runding, kunsi penemu sereta ulih duduk enggau pangan diri ti enda milih bansa, batang pengarap enggau asal penatai,” ku iya madah rambau bejadika pengerami Ngiling Bidai ti diatur Dayak Think Tank Association Sarawak (DTTAS) apin lama ke udah.
“Nya alai aku minta bala kita NGO Dayak baka DTTAS enggau ke bukai meratika program ti dipejalaika perintah tebal agi Strategi Pemansang Pasca COVID-19 (PCDS) 2030 sereta nerangka ngagai komuniti semua pekara ke beguna tu.
“Kitai deka terus besaup awakka tetiap iku ari kitai terus ngasaika pemaik enggau pemansang ke meruan nyentuk ke jemah ila,” ku iya madah agi.
Kelimpah ari nya, Uggah nyemetak madahka perintah nengeri seruran meri peluang ngagai rayat sereta raban NGO mantaika penemu sereta langgur ke manah ungkup pemansang nengeri sereta pengelantang rayat pupu bansa di Sarawak.
Ba dalam pengerami nya, Uggah udah ngemendarka duit turu penyampau RM150,000 ngagai DTTAS dikena gerempung nya bejalaika program pelajar ke diatu benung dipejalaika.
