KUALA LUMPUR, 10 Jun: Perintah setuju muai tauka ngemaduka ukum mati mandatori di menua tu sereta diganti ukum bukai ti bepanggai ba kuasa kort, pia ku Menteri di Opis Menteri Besai (Parlimen enggau Undang-Undang) Dato Sri Wan Junaidi Tuanku Jaafar madah.
Nengah siti penerang lebuh Hari Lima iya madahka, pemutus nya dijapai pengudah iya mantaika Ripot Pansik Ukum Ganti Ungkup Ukum Mati Mandatori ba aum Kabinet Menteri kena 8 Jun 2022 ke udah.
“Perintah mega nerima sereta belematika perambu Komiti Khas Ukum Ganti Ungkup Ukum Mati Mandatori ti diterangka nengah ripot pansik tu,” ku iya madah.
Wan Junaidi nerangka, perintah mega nerima sereta belematika perambu komiti khas ukum ganti ungkup ukum mati mandatori ti diterangka nengah ripot pansik nya.
Beduduk ari nya, komiti nya dituaika Tuai Akim Menua ke lama Tun Richard Malanjum enggau disereta pakar bidang undang-undang baka Akim Besai Malaya ke lama, Luyar Menua ke lama, pengemeran undang-undang, pengelicha undang-undang ari Institusyen Pelajar Perintah ke tebilang nama sereta pakar pansik jenayah.
Ku Wan Junaidi madah, Kabinet Menteri mega setuju pansik silik dipejalaika ti ngaul perambu ukum ganti senentang 11 penyalah ti mai ukum mati mandatori, siti penyalah ba baruh Seksyen 39B Akta Dadah Berbahaya 1952 (Akta 234) enggau 22 penyalah ti mai ukum mati, tang bepanggai ba kuasa kort.
“Pansik silik pekara nya deka dipejalaika nengah kerejasama Opis Luyar Menua, Seksyen Pekara Undang-undang, Opis Menteri Besai sereta opis menteri enggau ejensi bukai ke bekaul,” ku iya madah agi.
Iya nerangka, pengawa nya chukup beguna dikena nentuka ubah ba sekeda atur ti bekaul belematika pelasar taka enggau konstitusyen ari semua perambu ke diberi ngagai perintah udah tu.
