KUCHING, 9 Jun: Pengudah lebih dua taun sunyi berindik ari pandemik Covid-19, pengerami Hari Gawai ba Rumah Panjai Nanga Sumpa pulai richah.
Ku Tuai Rumah Nanga Sumpa, Andah Lembang madah,pengerami Hari Gawai siti ari pelantar dikena ngayanka pemanah adat enggau budaya ngambika enda lenyau ditelan arus pemansang ngambika rebak biak ulih nemu pesaka bansa diri.
Mayuh macham program diatur beserimbai enggau pengerami Gawai dikena ngaul peranak rumah panjai.
“Pengerami hari gawai tu kami naka ulih ngerembaika adat gawai ngambika enda lenyau. Nyadi bala anak uchu ichit dudi hari ulih meda enggau nampung pengawa tu,” ku iya lebuh dirandau pengarang berita TVS, empai lama ti udah.
Tuai Pengataur Program Gawai, Fraser madahka rogram gawai diatur tiga hari berunggu berengkah 31 Mei nyentuk 2 Jun.
Ba hari keterubah sebedau ngintu malam 31 Mei, tim begendang kantu Batang Ai ti betuaika Semelang ngepunka pengawa begendang ari ruai siti ke ruai siti seraya ngapuska malam.
Ba hari kedua, program diteruska enggau aktiviti sukaneka ti mungkur lebih 50 iku nembiak mit.
Kelimpah ari nya, adat niti daun enggau ranyai mega bisi diatur ti sebagi ari aktiviti ninting taun maya Gawai.
Ku iya madah, tuju tu mega dikena ngerapitka agi kaul peranak rumah panjang lalu nyadika pelantar dikena mandangka budaya enggau adat ngagai bansa bukai.
