KUCHING, 8 Jun: Perintah Sarawak terus ngemeratka pengawa betanam betupi nguna chara baru tauka bepelasarka teknologi ti tau mantu ngemesaika pengeluar utai tanam sereta nyungkak asil penatai pemisi orang bekebun enggau bumai.
Beduduk ari nya, Premier sarawak, Datuk Patinggi Tan Sri Abang Johari Tun Openg nyemetak madahka, betanam betupi ti nguna Internet of Things (IOT) ulih mantu nentuka tikas pengembap enggau pengangat tanah ke manah endur bekebun sereta penyampau sum ke patut diterima utai tanam.
Pemisi aplikasyen enggau teknologi tu ngemudahka pekebun ngatur sereta ngemataka pengawa bekebun ninting hari.
“Bisi aplikasyen ke ulih nentuka tikas penyampau sum ke diberi ngagai utai tanam awakka meri asil ke lebih manah. Ambika chunto ba pengawa nanam padi tauka bumai. Pengawa bumai kira dua kali setaun. Tang, bisi saintis madahka ba menua Jepun sida ulih bumai tiga kali setaun,” ku iya madah.
Ku iya madah, tu mandangka bisi chara enggau teknologi ke ulih dikena nambahka penyampau padi ke ditanam ti tau nguntungka orang ke bumai.
Beduduk ari nya, iya meransang pekebun moden terus nelebaka diri nguna teknologi ngambika ngemudahka sida ngemataka penumbuh padi ke ditanam.
“Semua sektor ekonomi kitai mesti bepelasarka teknologi dikena nambahka pengeluar sereta kualiti. Pia mega, orang ke nerima gaji ke tinggi sereta mantu ngemansangka industri di nengeri kitai,”
Iya bejaku munyi nya pengudah bejadika Simposium Antarabansa Bekaul enggau Transformasyen Industri Digital ti diatur Palan Penyulut Teknikal Sarawak (CENTEXS) lebuh Hari Dua.
