KUCHING, 25 Mei: Opis Menteri Dagang Temuai, Industri Kreatif enggau Seni Pemerindang nengah Kaunsil Kraf Sarawak enggau ejensi ke bekaul bekenanas deka ngerembaika pemansang kraf nengah strategi komprehensif ba baruh Strategi Pemansang Pasca COVID-19 2030 (PCDS 2030) sereta inisiatif bukai.
Ku Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah madah, tuju nya dikena ngemunka seraya mantu ngelengkaska pemansang industri nya awakka nguntungka rayat enggau nengeri.
“Entara inisiatif nya baka ngatur, numbuhka kerejasama enggau Perbadanan Kemajuan Kraftangan Malaysia Pampang Sarawak enggau ejensi bukai, ngatur bazar kraf jari di serata nengeri dikena nyendiaka pelantar ngagai pedagang kraf jari mantaika enggau nyual produk sida.
“Ngatur program ngaga kapasiti dikena nambahka pengelandik sereta chara bedagang ke lebih manah awakka ulih nyapai saran asil jual RM183.6
juta manggai taun 2030,” ku Abdul Karim madah rambau nyimpul jurai Opis Menteri Dagang Temuai, Industri Kreatif enggau Seni Pemerindang ba aum Kunsil Nengeri (DUN) Sarawak ke-19 lebuh Hari Tiga.
Kelimpah ari nya, inisiatif ti keempat iya nya nyendiaka palan dagang enggau pemandang tetap di serata Sarawak.
“Kelima deka bekerejasama enggau ejensi enggau siku-siku orang ba pengawa ngelangkar sereta ngeluarka produk kraf jari ke baru dikena mantu nambahka rentayan produk kraf jari Sarawak,” ku iya madah agi.
Iya nerangka, di Sarawak Perbadanan Kemajuan Kraftangan Malaysia
Pampang Sarawak ngeripotka penyampau dagang kraf ba taun 2019 iya nya RM31 juta ti dibanding RM15.7 juta ba taun 2021, kira-kira 15% ari penyampau dagang nengah chara dalam tali arus.
“Ungkup taun 2022, saran asil dagang iya nya RM15.5 juta enggau nyentuk bulan April 2022, penyampau asil dagang manggai RM7 juta,” ku iya madah agi.
