KUCHING, 25 Mei: Rayat ke diau di menua pesisir diperansang ngaul diri ba sektor eko dagang temuai.
Opis Menteri Dagang Temuai, Industri Kreatif enggau Seni Pemerindang deka mekuhka pengawa ngemansangka eko dagang temuai enggau dagang temuai ti ngaul komuniti taun tu.
Ba baruh Strategi Pemansang Pasca COVID-19 2030 (PCDS 2030), siti ari pekara ti dikemeratka iya nya nyungkak sektor dagang temuai ti ngaul komuniti penyampau 20% seraya deka nambahka asil penatai pemisi ruang bilik komuniti ke ngaul diri ba dalam program tu.
Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah madahka, opis menteri nyaran deka nambahka ari 46 kluster ngagai 48 kluster homestay taun 2022.
“Inisiatif nya nyerangkung rejister mayuh agi kluster homestay, nambahka kapasiti peranak menua nengah chara ngemanahka agi produk enggau servis sida.
“Ari sukut ulah, pengelandik enggau penemu ke manah ulih nyikap pengemeran industri dagang temuai enggau raban gawa di luan nerima penarai temuai ke nengeri tu,” ku Abdul Karim madah rambau nyimpul jurai Opis Menteri Dagang Temuai, Industri Kreatif enggau Seni Pemerindang ba aum Kunsil Nengeri (DUN) Sarawak ke-19 lebuh Hari Tiga.
Nangkan ke nya, Abdul Karim madahka, eko dagang temuai endang udah nyadi aktiviti ekonomi ti meruan ba serata dunya.
“Tu mega deka meri peluang ngagai temuai ngasaika peneleba meretika pemanah rampa menua enggau budaya sereta ulih belajar senentang guna ngenanka biodiversiti enggau budaya peranak di menua tu,” ku iya madah agi.
Kelimpah ari nya, eko dagang temuai mantu nyungkak asil penatai pemisi sereta nguntungka rayat ke mendam di menua ulu enggau menua pesisir.
Dikena nambahka peranak di menua pesisir ngambi bagi ba sektor dagang temuai ke ngaul komuniti, opis menteri nya udah numbuhka kerejasama enggau sekeda ejensi ke bekaul.
“Beduduk ari nya, program randau di entara Pengemeran Homestay enggau Pengempu Produk Dagang Temuai deka diatur kena 11 nyentuk 12 Jun 2022 di Lundu nengah chara tentatif,” ku iya nambah. – TVS
