KUCHING, 12 Mei: Perbadanan Kemajuan Filem Nasional Malaysia (FINAS) beranakka puku sepenyampau RM3 juta ungkup Program Malaysian Fiction Feature Film Development Lab (MyLAB).
Nitihka padah Tuai Pegawai Eksekutif FINAS, Prof. Dr Md Nasir Ibrahim, program tu siti ari inisiatif dikena mantu pengemeran seni kreatif di menua tu.
Program MYLAB tebuka ngagai penulis skrip, direktor enggau produser ngasilka skrip tauka filem sida ba baruh iring tebangkar filem ba renggat menua enggau entara bansa.
“Siti ari insentif tauka perais ungkup pesereta ke dipilih ari enam projek, iya nya tiga iku ke pemadu manah, deka bulih insentif RM20,000,” ku iya.
Iya mansutka jaku nya ba Program Sejahtera Asia TVS maya Hari Empat.
Ku iya madah, bisi 10 iku tenaga pengajar ari menua luar ke ngembuan pengelandik dalam mayuh bengkah bidang nyereta program MyLAB tu.
“Sida mega udah mantaika kualiti ti manah enggau ngambi bagi nyadi produser industri filem ke udah mujur bulih mayuh anugerah ba renggat dunya,” ku iya.
Kelimpah ari nya, ku iya nambah, MyLAB ukai semina ngemeratka siti elemen aja dalam dunya filem tang penyereta dalam program tu mungkur mayuh bengkah bidang enggau pengelandik.
Ba program nya, penyereta deka diajar, diembing pengajar sereta bekunsika penemu dalam pengawa ngasilka projek filem ti bekualiti. – TVS
