SIBU, 12 Mei: Program ba ikas entarabansa ti deka diatur di Sarawak taun tu dijangka matak temuai sekalika di menua tu enggau ari menua luar.
Sekretari Mendam di Opis Menteri Dagang Temuai, Industri Kreatif enggau Seni Pemerindang Sarawak Hii Chang Kee madahka, penyampau temuai datai ke Sarawak deka nambah berindik ari mayuh program besai ti deka diatur di nengeri tu.
“Sarawak diatu udah berengkah ngatur mayuh macham program enggau festival ba ikas entarabansa lebih agi ba bulan Jun ti deka datai tu ila.
“Sibu International Dance Festival deka diatur kena 9 nyentuk 11 Jun 2022, ditangkan ke program ti dikangau ‘Spartan Race’ iya nya lumba ke betagang mega deka diatur,” ku iya madah.
Hii Chang Kee madahka, kena 16 nyentuk 17 Jun, Rainforest World Music Festival ti tebilang di serata dunya deka diatur sereta seminggu udah nya ‘Borneo International Jazz Festival’ deka diatur di Miri.
“Nyadi, sepemanjai bulan Jun 2022 tu kitai bisi empat program ba ikas entarabansa ti diatur enggau tu siti peluang ke manah,” ku iya madah agi.
Berindik ari nya, iya arapka nengah program besai nya penatai temuai ke sarawak nambah ti dibanding ba bulan Mac ke udah seraya nyapai saran opis menteri ti deka nerima 1.2 juta iku temuai datai ke Sarawak.
Iya nerangka, perintah udah ngemendarka pengerami Hari Raya disambut enggau garis entara menua udah dibuka ti ngujungka temuai datai ke Sarawak udah nambah manggai 5% ti dibanding ba bulan Mac taun 2021.
“Kitai chukup gagit ati meda penambah temuai ke datai berindik ari garis entara menua udah dibuka sereta temuai ari menua luar udah dikemendarka datai nemuai,” ku iya madah agi.
