SELANGAU, 4 Mei: Perintah nengeri endang ngemeratka pemujur enggau pengelantang raban nembiak di Sarawak ti nyengkaum nembiak di Selangau.
Berindik ari nya, duit turu dikemendarka perintah dikena sekeda gerempung enggau serakup ke ngaul nembiak ngatur aktvitivi lumba enggau main.
Menteri di Opis Premier Sarawak, Datuk John Sikie Tayai madahka, iya udah ngungkupka duit turu penyampau RM400,000 dikena ngangkatmanah tikas endur main futsal di Bukit Dinding.
“Ungkup tu dikena ngangkatmanah endur main futsal awakka disikap enggau perabung sereta perengkaguna ke bukai ti nyengkaum jamban.
“Projek tu deka dipejalaika ba taun baru. Ukai ba dalam taun tu,” ku iya madah rambau bejadika Kejohanan Futsal Piala Datuk John Sikie Tayai beserimbai enggau pengawa bejadika endur main futsal Bukit Dinding apin lama ke udah.
Kelimpah ari nya, iya deka nambahka penyampau perais ba dalam pekit main futsal iya nya Champion deka nerima RM1,200, lumur dua RM1,000, lumur tiga RM700 enggau lumur empat RM500.
John Sikie ke mega Kaban Kunsil Nengeri Kakus ngelalau raban nembiak di Selangau nguna manah maya lepa sida ngambi bagi aktiviti ke meri pemaik ngagai sida sereta nyeliahka diri ngereja pengawa ti tau ngeruga pengerai.
“Tu mih siti ari chara kami ke nyadi tuai rayat, pengari rayat mantu raban nembiak ba pengawa ke patut. Pia mega, raban nembiak patut nyaup pangan diri ngereja sebarang pengawa ngambika mujur.
“Guna manah-manah peluang kita ngemansangka diri,” ku iya madah agi.
Berindik ari nya, iya minta raban nembiak seruran ngemeratka pelajar ungkup pengidup ke lebih menyana jemah ila.
