LIMBANG, 27 April: Pemansang ba rumah panjai enggau genturung pendiau iya nya asil ari kerejasama enggau sukung entara tuai peranak, rayat enggau Komiti Pemansang enggau Pengelikun Genturung Pendiau (JKKK).
Ngambi penerang ari UKAS, Kaban Kunsil Nengeri (ADUN) Batu Danau Paulus Palu Gumbang madahka, JKKK bejalaika tangkup pengawa ke beguna dikena nentuka pengelantang, penegap sereta pemansang sosioekonomi genturung pendiau.
“Penerang akaun JKKK enggau tetiap pemindah duit deka dibantaika ba aum ninting taun. Tuju nya dikena nentuka tetiap duit ba baruh JKKK diguna enggau manah.
“Kelimpah ari nya, JKKK mega mantaika peminta ungkup sekeda projek pemansang nengah aum ke udah diatur nya,” ku iya madah rambau ba Program Makai Lemai beserimbai enggau Hari Keluarga ti diatur JKKK Kampung Pengkalan Madang apin lama ke udah.
Berebak ari nya, Paulus ngelalau peranak awakka bejalaika tangkup pengawa diri lebuh nerima sereta bekunsika penerang ke dikerembaika di laman rama.
“Tetiap penerang ke diterima mesti diperatika silik dikena nentuka berita nya betul tauka engkeman,” ku iya madah agi
Iya mega nangkan peranak di sitak Batu Danau anang bekunsika penerang enggau berita sebubu ngapa dikena nyeliahka isu bukai ke tau ngeruga pengelantang sereta pengelikun mensia mayuh.
