KUCHING, 17 April: Mandal Presiden Parti Pesaka Bumiputera Bersatu (PBB), Dato Sri Abdul Karim Rahman Hamzah madahka, Sabah enggau Sarawak mayuh mantu ba pemansang menua dalam nentuka penegap Malaysia maya betapi enggau penyarut politik ti enda tentu sebedau tu.
Berebak enggau nya, ba penemu iya sigipatut diperundingka pengari ari Sabah enggau Sarawak bisi megai pangku pengawa ke tinggi dalam merintah menua.
“Enti ukai PM, nyadi Sapit Menteri Besai, enda salah kedua-dua wilayah tu patut diberi peluang megai pangku pengawa tu tauka numbuhka Sapit Menteri Besai ke diisi enggau chara begintir ari pengari Sabah enggau Sarawak,” ku iya pengudah ngulu Program Kasih Belia Ramadan lebuh Hari Enam.
Abdul Karim Ke Mega Menteri Dagang Temuai, Industri Kreatif enggau Seni Pemerindang Nengeri madah munyi nya lebuh dipinta nerang senentang pekara ke guna Gabungan Parti Sarawak (GPS) bisi pengari dalam perintah Malaysia pengudah Pengawa Bepilih Besai ke-15 (PRU-15) tu ila.
