KUCHING, 16 April: Tetiap iku nembiak di nengeri Sarawak sekalika nembiak ba sekula perintah, sekula peribit enggau sekula mulaika pemanah ulah diberi peluang ke sama ngemansangka diri ba dalam mayuh macham bidang.
Menteri Pemansang Orang Indu, Nembiak Mit enggau Pengelantang Komuniti, Dato Sri Fatimah Abdullah madahka, nembiak ba sekula mulaika pemanah ulah di Sekula Henry Gurney (SHG) enggau Sekula Integriti Puncak Borneo mega diperansang belajar sereta ngulihka penemu, enggau pengelandik ba bidang Sains, Teknologi, Engineering enggau Matematik (STEM) sereta vokasional.
“Kedua-dua bidang tu endang dikemeratka Perintah Sarawak di renggat sekula laban bidang nya ulih mantu nyungkak pemansang ekonomi nengeri, menua enggau siku-siku orang.
“Nyadi kitai deka ngaluska pekara nya lebih agi baka ni kitai deka bekerejasama. Kitai nyadi fasilitator enggau raban penyendia servis sereta institusyen ke bisi nyendiaka kus ti deka dikelala lalu siti ari kus nya landskap,” ku iya madah rambau ditanya pemberita sepengudah ngulu Pengerami Pengelantang Komuniti Sekula Henry Gurney lebuh Hari Lima.
Kelimpah ari nya, Fatimah nerangka, Serikat Bekaul enggau Perintah (GLC), Palan Panyulut Teknikal (CENTEXS) bisi nyendiaka mayuh macham kus pengelandik enggau latih ti nyerangkung bidang Teknologi Pemadah (IT) ke ulih matak pengerindu nembiak ngambi kus nya.
Pia mega, sepengudah pansut ari sekula nya dudi hari sida ulih diterima gawa ba serikat nitihka bidang tauka kus diambi seraya ulih ngiga asil belanja ungkup sida empu dikena neruska pengidup.
“Pekara tu chukup beguna laban nandaka basa ngagai siku-siku orang ti sigi arapka diri nyapai penyulut ba siti-siti pekara lalu entara nya deka bulih peluang gawa,” ku iya madah agi. – TVS
