KUALA LUMPUR, 15 April: Industri Sawit menua deka terus ditegapka perintah nengah kerejasama entara Lembaga Minyak Sawit Malaysia (MPOB), Kaunsil Minyak Sawit Malaysia (MPOC) enggau Kaunsil Setipikit Minyak Sawit Malaysia (MPOCC), pia ku Menteri Kebun Bedandang Besai enggau Komoditi, Datuk Zuraida Kamaruddin madah.
Iya madahka, kerejasama ketiga-tiga ejensi nya ngemudahka pengawa nyapai misyen enggau nambahka daya kereja ke lebih tegap ti dibanding bejalaika pengawa kediri.
“Enti sema semua ejensi nya diengkah ba baruh siti perabung juluk enggau pekara ti dikemeratka ulih diadu manah agi sereta besenutuk.
“Kitai deka meda kerejasama tu siti chara ke lebih engkeman dipejalaika. Pia mega, tu dikena nentuka pengawa sida enda betinggang enggau pangan diri,” ku iya madah rambau pengerami buka puasa beserimbai enggau Aum Besai enggau Ekspo Agrikomoditi Antarabangsa Malaysia 2022 (MIACES 2022) lebuh Hari Empat.
Zuraida madahka, pekara tu mega seririh enggau saran menua ti deka nambahka penyampau ekspot agrikomoditi ba taun 2022.
Berebak ari nya, iya nerangka, opis menteri iya nyaran deka nyadika Aum Besai enggau Ekspo Agrikomoditi Antarabangsa Malaysia 2022 (MIACES 2022) kena 26 nyentuk 28 Julai 2022 siti pelantar dikena bedajaka produk komoditi sereta ngemanahka tikas produk ke udah bisi nengah mayuh macham pansik teknologi.
“Opis Menteri Kebun Bedandang Besai enggau Komoditi (MPIC) pechaya penyampau ekspot agrikomoditi Malaysia deka terus ngerikodka penambah lebih agi menua diatu udah ngalih ke renggat endemik,” ku iya madah agi.
Ku iya madah agi, Pelasar Agrikomoditi Menua 2030 ti seriris enggau Langgur Malaysia Lumpar Ke-12, MIACES 2022 deka dijadika entara inisiatif dikena nentuka sektor agrikomoditi menua terus ngerembai, ti nyerangkung di renggat entarabansa.
