KUCHING, 14 April:Sebuah bot orang berikan menua tu mujur ditan raban Polis Marin Wilayah 5 (PPMW5) Kuching, ketegal berikan ba endur ke ditagang.
Nitihka komander nya, Asistan Komisioner Zulfikar Mohd Ghazali, bot ronda polis marin udah ngetan bot nya ti benung berikan enggau penyauh lebih kurang 9 Batu Nautika ari tebing tasik Pulau Lakei, pagi kemari.
Asil ari tasat tumu, juragan bot mega ngaku bejalaika pengawa berikan nguna pukat anyut.
Zulfikar dalam penerang nya madah, pansik silik ngagai bot nya mega dipeda ngelanggar penetap lisin enggau penyauh endur berikan ti ditetapka nitihka Seksyen 8 (b) Akta Perikan 1985.
Siku juragan enggau tiga iku agi kru ke mega peranak menua Indonesia ditan polis Marin dalam operasyen nya.
Ku iya madah, sida ke ditan tu beumur entara 19 nyentuk 42 taun.
Dianggarka semua ungkus rega barang nyengkaum perengka berikan enggau ikan mayuh bansa ke dirampas iya nya RM185, 000.00.
Semua barang ke dirampas udah dibai ngagai jeti PPMW5 Kuching ngambi ulih bejalaika atur ke patut.
