SIMUNJAN, 14 April: Opis Menteri Kebun Bedandang enggau Komoditi (MPIC) pechaya berindik ari garis entara menua enggau pemindah ditenduka ba pun ari bulan April, pengeluar industri koko dijangka deka majak nambah sereta mantu mulaika pemanah ekonomi menua pasca COVID-19.
Sapit Menteri Kebun Bedandang enggau Komoditi Datuk Willie Mongin madahka, ambika chunto opis menteri udah nyendiaka mayuh macham sukung, bantu enggau insentif ngagai pekebun enggau pengemeran sektor agrikomoditi di Sebuyau.
“Bantu penyampau RM46,800 udah diberi ngagai 16 iku pekebun ba baruh Skim Tanaman Lada Baharu ari Lembaga Lada Malaysia,” ku iya madah.
Iya mansutka jaku nya rambau bejadika Palan Mit Nginjin Koko enggau Jalai Ladang beserimbai enggau program Jelajah Agrikomoditi #keluargamalaysia 2022.
Program nya diatur ba Rumah Panjai Unga, Kampung Ketimbong, Sebuyau lebuh Hari Tiga.
Kelimpah ari nya, iya nerangka, Lembaga Koko Malaysia (LKM) bisi numbuhka ‘Farmers Field School’ ba komuniti pekebun koko Sebuyau.
Lembaga Getah Malaysia (LGM) enggau Lembaga Minyak Sawit Malaysia (MPOB) udah kala meri bantu ngagai pekebun mit ti nyerangkung bantu sum sereta inisiatif nanam semula pun kayu.
“Opis menteri pechaya berindik ari garis entara menua udah dibuka enggau sekeda penetap pemindah ditenduka, pengeluar industri koko dijangka deka nambah seraya mantu mulaika pemanah ekonomi menua pasca COVID-19,” ku iya madah agi.
Palan Mit Nginjin Koko Kampung Ketimbong nya disikap enggau kutak meram ti ngembuan kapasiti 100 kilogram igi koko basah enggau pelantar dikena ngerangkaika igi koko.
“Igi koko ke diinjin lebih bekualiti sereta ulih dijual ba rega ke tinggi,” ku iya nerang agi.
Berebak ari nya, senentang Jalai Ladang Kampung Ketimbong udah tembu kena bulan 11 2020 ti dikemansangka berenggat ba taun 2018, enggau pemanjai 0.75 kilometer sereta ba taun 2020 enggau panjai jalai ditambah satu kilometer. – TVS
Sumber gambar: Jabatan Penerangan Sarawak
