SRI AMAN, 14 April: Sapit Menteri Pemansang Pengelandik Datuk Francis Harden Hollis nerima penemuai basa ari Kolej Universiti I-CATS ba bilik aum Opis Pelajar, Inovasyen enggau Pemansang Pengelandik Sarawak (MEITD), Tingkat 11, Menara LCDA, The Isthmus, Kuching , ensanus.
Ku iya madah, pekara ke dirandau dalam aum iya nya bekaul enggau mayuh macham bidang ke bisi disediaka I-CATS lebih agi dalam bidang teknikal enggau kus timpuh pandak ngagai nembiak ke udah abis peresa Sijil Pelajaran Malaysia (SPM).
Ba awak ke sama, diterangka senentang bantu skularship ungkup nembiak ke nampung pelajar.
“Bantu skularship ari Yayasan Sarawak ungkup nembiak ke patut enggau duit jali PTPTN,” ku iya.
Kolej Universiti I-CATS ti bepalan di Tabuan Jaya nyendiaka buding ngagai nembiak enggau suwa RM150.00 sebulan ungkup siku nembiak.
Ku iya nambah, bilik dalam buding tu mega chukup endur dua iku nyentuk empat iku nembiak nitihka pemesai bilik nya.
Sama bisi datai maya penemui meri basa tu iya nya Mohd Hisham Fauzi, Chief Commercial Officer; Dr Leo Sing Lim – (Technical Specialist) Vice Chancellor; Stanley Gonna Chee Kiong – Head Of Research And Corporate Affairs enggau Jong Tien Kiong – Marketing And Recruitment Manager (Local And International).
Kelimpah ari nya aum tu bisi digulu Tuai Begian Pengawa Pansik, MEITD , Asha Devi Kaushal, enggau Begian Pemansang Pengelandik, Zulkipli Ismail.
