KUCHING, 13 April: Berindik ari pengekai igi penyakit COVID-19, mensia mayuh ninting hari bebelika sereta nguna sengkabung mua.
Sengkabung mua ti ngangkatka chura Borneo entara produk ke nerima sambut ke pemadu manah lebih agi ari peranak menua luar.
Rowena Cliffton siku ari orang dagang madah, produk ari chap dagang ngangkatka nama iya empu nya kala dibeli orang menua luar.
Ku iya, nya nyengkaum sida ari United Kingdom (UK), United States (US), Pakistan, Singapore, Brunei lalu bisi mega ari Semenanjung enggau Sabah kelimpah ba Sarawak ditu empu.
“Maya musim pandemik tu kami bulih sambutan ti besai amat ari menua luar baka sida ari menua London, US, UK, bisi mega menua Pakistan. Sida gaga ke sengkabung mua chura Borneo tu,” ku Rowena.
Ku iya madah agi, kelimpah diguna nyadi kereban pengelikun diri, mensia mayuh ulih begaya enggau sengkabung mua bechura Borneo tu.
Rowena madahka, iya temegah ati laban ulih ngasilka sengkabung mua asil ari keranjai jari iya empu.
Pia mega, nya entara pengawa ti meri asil penatai pemisi sereta mantu nyungkak penumbuh ekonomi menua.
“Kelimpah ari nya, kami mega deka sama ngemansangka ekonomi menua, nya mih juluk ati ati kami,” terang iya.
Berindik ari nya, iya arapka mensia mayuh terus meri sukung ngagai pedagang di nengeri tu awakka terus mansang sereta ransing agi bejalaika dagang. – TVS
