KUCHING, 11 April: The Magnifico ‘King of Kenyalang’ ngemegahka Sarawak pengudah menang anugerah Best in Nasional Custome ba pekit Mr Cultural Ambassador MCA 2022 ti diatur di Kota Kinabalu, bedau lama ti udah.
Penengkebang fesyen, Bruno George Sadiwa, asal ari Sabah nguji penau diri nengkebang siti kostum nasional ti keterubah mantaika lambang budaya Sarawak.
Iya bekerejasama enggau Adriel (pengari ari Sarawak) ngasilka ‘Nasional Costume’ ti ngayanka asil pengelandik jari ke nguna motif Sarawak nyata dipeda lebuh dipandangka.
Kostum Bruno nya dipandangka Adriel Nyawai ke mega siku pesereta ari Lubok Antu ngarika Sarawak ba Panggau Mister Cultural Ambassador 2022.
“Konsep ke dipilih ungkup Kostum Mr Cultural Ambassador ke dikena Adriel iya nya konsep raja ti dipegulai enggau motif enggau tradisi budaya nengeri Sarawak.
“Siti ari nya Jata Negeri Sarawak, Burung Kenyalang enggau motif tradisi bansa Iban iya nya kain ‘pua kumbu’,” ku iya lebuh dirandau TVS empai lama.
The Magnifico ‘King of Kenyalang’ udah mujur ngalahka 15 pesereta ke bukai.
Ngelansa sentang ngaga kostum, kira-kira 500 jam pengelama iya ngasilka kostum nya ti mayuh nengah proses nyengkaum ari proses ngelangkar, mutung, nyait ngias, milih chura enggau perengka ngepan.
