KUCHING , 30 Mac : Kaban Parlimen Sri Aman Dato Masir Anak Kujat dijangka enda betanding ba Pengawa Bepilih Besai (PRU) Ke-15 tu ila.
Taja pia ku Masir madah, pemutus tu berubah enti nyema bisi parti ke deka iya ngetanka kerusi parlimen nya.
“Enti nitihka aku, sigi enda betanding tang tu bepanggai ba parti ke deka ngambi aku,” ku iya lebuh ditelefon TVS sehari tu tadi.
Masir sehari tu madahka diri pansut ari Parti Sarawak Bersatu (PSB) lalu madahka diri nyukung Menteri Besai, Datuk Seri Ismail Sabri Yaakob ti nyadi tuai ba atas tikit Perikatan Nasional.
Ba taun 2018, Masir menang kerusi nya lebuh ngarika Parti Rakyat Sarawak (PRS) ti maya nya agi ba baruh komponen Barisan Nasional (BN).
Taja pia ba taun 2019, iya madahka diri pansut ari Parti Rakyat Sarawak (PRS) lalu tama ngagai Parti Sarawak Bersatu (PSB), siti agi parti penyakal di Sarawak.
Nangkan ke nya lebuh ditanya senentang tunga kuing politik iya, Masir madahka iya tebuka tauka nerima enti Parti Rakyat Sarawak (PRS) deka nerima iya baru nyadi kaban PRS.
“Sida (PRS) ngemendarka aku betanding baru tauka enda ( enti pulai baru ngagai PRS ) aku enda nemu laban kaban politik di sitak nya enda ngemendarka pekara tu nyadi,” ku iya madah agi.
Ungkup penerang ba pengawa bepilih besai (PRU) 2018, Masir ngarika Parti Rakyat Sarawak (PRS) ba baruh Barisan Nasional (BN) enggau menang majoriti 5,820 undi.
