PUTRAJAYA, 24 Mac: Penyampau kes penyakit tuberkulosis tauka tibi ti diripotka di Malaysia ba taun 2021 iya nya 21,727 , nurun 8.1 peratus ti dibanding 23,644 kes ba taun sebedau nya, pia ku Menteri Pengerai Khairy Jamaluddin.
Penyampau kes pemati ketegal tibi ba 2021 iya nya 2,288 nurun sepenyampau 32 kes pemati tauka 1.4 peratus ti dibanding ba taun 2020,” ku iya madah ba dalam siti penerang beserimbai enggau Hari Tibi Sedunya 2022 lebuh Hari Empat.
Tibi tauka batuk rangkai iya nya penyakit berampit ti nyadi ketegal bakteria Mycobacterium tuberculosis enggau ngekai nengah angin.
“Kelai penyakit tibi tu iya nya batuk nyentuk ke lebih ari dua minggu, tabin, peluh maya malam, nadai asai deka makai, nurun berat tubuh sereta batuk bisi darah,” ku iya madah.
Berebak ari nya, Khairy nerangka senentang pesakit tibi ulih gerai enti nitihka timpuh berubat ke udah ditetapka enggau bisi risiko dirampit baru tibi enggau drug resistant TB iya nya antibiotik enda ulih nagang penumbuh bakteria enti sema nitihka timpuh berubat ke ditetapka.
Chara ngubat penyakit tibi tu iya nya nguna empat bansa antibiotik ti disegulaika ti ngaul Ethambutol, Isoniazid, Rifampicin enggau Pyrazinamide (EHRZ) ba renggat intensif sepengelama dua bulan enggau dientudika dua bansa antibiotik iya nya Isoniazid enggau Rifampicin (HR) ba renggat udah nya sepengelama empat bulan.
“Ngasika pekara ti ditetapka maya berubat endang beguna dikena nentuka pesakit tibi ulih gerai,” ku iya madah agi.
Kelimpah ari nya, Khairy ngelalau peranak di menua tu ngambika anang salah reti senentang penyakit tibi sereta stigma ngagai pesakit tibi mesti diketuka.
“Kerejasama ari semua orang di menua tu begunaka dikena nentuka juluk Malaysia beresi ari tibi manggai taun 2035 ulih dijapai,” ku iya madah agi.
