KUCHING, 24 Mac: Sapit Menteri Pelajar, Inovasyen Enggau Pemansang Pengelandik Ii, Datuk Francis Harden Hollis nerima penemuai basa ari kaban kunsil enggau pegawai Opis Pelilih Sri Aman (MDSA) di bilik aum Opis MEITD Sarawak, Menara LCDA, Kuching kena Hari Tiga.
Bisi 11 iku kaban kunsil ngarika parti komponen dalam Gabungan Parti Sarawak (GPS) enggau enam iku pegawai MDSA ti betuaika Anthony Abell Chendan ke mega Walikota MDSA.
Ku Harden madahka, aum lebuh penemuai nya ngaul mayuh bengkah pekara baka pengawa nyiri sapit walikota MDSA ke baru, agih belanja tambah ungkup projek pemansang mengeri Simanggang nyengkaum ngulihka belanja bejalaika aktiviti MDSA taun 2022.
“Dalam kitai berandauka pekara ti dibantaika raban kunsil, kitai mega ngiga chara mutarka isu ke bekaul ungkup pengelantang rayat di Sri Aman,” ku iya dalam siti penerang lebuh Hari Tiga.
Iya ke mega Kaban Kunsil Nengeri (ADUN) Simanggang bisi ngungkupka duit turu Projek Mit Menua Pesisir (MRP) sepenyampau RM6,000 ngagai Kelab Main enggau Rekreasyen MDSA dikena ngatur aktiviti kelab sida.
Sebedau tu mega, Harden bisi ngatur aum begulai enggau Komiti Pemansang enggau Pengelikun Genturung Pendiau (JKKK) Kampung Muhibbah Zon Selatan sereta Opis Parit enggau Entali Ai (DID).
Ku iya madah, entara pekara ke dirandau iya nya sentang gaya sistem parit ti enda efisien ke udah meri penanggul ngagai salur ai parit enda lanchar ngujungka penusah bah suah nyadi lebuh musin pengujan.
