KUCHING, 20 MAC: “Anang sesekali ningkalka api dapur gis” nya entara jaku tangkan Tuai Balai Bomba enggau Penyelamat (BBP) Sarikei, Mahmudin Narudin ngagai mensia mayuh.
Tu sebagi ari chara dikena ngiri penemu mensia mayuh lebih agi ngagai peranak rumah panjai bekaul enggau pekara pengelikun berindik ari penusah angus nyau deka ninting minggu diperati bisi nyadi di Sarawak.
Ku iya madah, enti ulih anang sesekali ninggalka api dapur gas nyema bisi nyumai pemakai.
Pia mega, lebuh nguna kereban elektrik tauka karan tentuka nya ba tikas ke likun dikena nyeliahka penusah angus ari nyadi.
“Enti sema bisi penusah angus di rumah, enti ulih jampat madamka api nya sebedau nyadi besai. Tentuka semua karan enda ditinggalka. Anang sesekali ninggalka api dapur lebuh nyumai tauka nguna pekakas elekterik. Enti penusah angus mit, padamka jampat lalu anang takut madamka api nya,” ku iya nerang ngagai pengarang berita TVS.
Kkenu ku iya, singkang tumu ari mensia mayuh ulih mantu raban bomba bejalaika pengawa nyaga pengelikun.
Nya kebuah, bomba chakah meri penyedar ngagai mensia mayuh sentang sukut pengelikun laban tanggungpengawa tu enda ulih kediri enti nadai sukung ari semua orang.
