KUCHING, 18 Mac: Rayat di menua tu tebal agi orang ke lunggar umur terus dilalau ngambi tuchuk dos vaksin COVID-19 enggau dos penyungkak.
Beduduk ari nya, Opis Menteri Pengerai (KKM) minta orang ke lunggar umur nganjung diri ngambi vaksin awakka ulih nyeliahka sida ke bisi penyakit berat ke mudah dirampit igi penyakit COVID-19.
Menteri Pengerai Khairy Jamaluddin madahka, penyampau kes pemati mayuh dirikodka ngaul orang ke lunggar umur ke bedau nerima vaksin, tauka udah nerima dua dos vaksin tang bedau ngambi dos penyungkak.
“Kitai deka nyaga apai, indai, aki, ini kitai laban sida agi napi risiko tinggi dirampit penyakit COVID-19 nyentuk ke tikas ke lebih berat enti sema enda ngambi dos penyungkak.
“Laban kitai nemu pengasi vaksin majak kurang udah beberapa bulan. Dos penyungkak ulih nambahka sistem imuniti tubuh sida,” ku iya madah.
Iya nyemetak madahka, anak mesti meransang apai indai enggau sida sebilik ke lunggar umur lengkas agi ngambi vaksin enggau dos penyungkak.
“Kitai ke nyadi anak tauka orang ke dalam ruang bilik mesti bejalaika tangkup pengawa nganjung apai, indai, aki, ini kitai ngambi dos penyungkak. Enti kita sayau ke sida kita patut mai semua sida ngambi dos penyungkak,”
Khairy mansutka jaku nya nengah video Tiktok ti dikunsika iya ba laman Facebook Opis Menteri Pengerai Malaysia lebuh Hari Empat. – TVS
