KUCHING, 17 Feb: Menteri Pengerai, Khairy Jamaluddin merambu deka numbuhka akta baru dikena nagang aktiviti nginsap enggau ngembuan sebarang produk insap nyengkaum vape ngagai rebak biak ke ada limpas taun 2005 tauka ‘Generational End Game’ .
Akta baru nagang nginsap nya ditumbuhka dikena nerenak pemereti ati rebak biak ngambika enda tepejuh ba aktiviti nginsap.
Tu laban ku iya madah, insap enggau produk tembakau entara pun kebuah ulih kena riman lalu 22 peratus kes pemati iya nya ketegal sakit riman.
Ku iya, ungkus belanja ngubat penyakit riman lempuang ketegal nginsap dianggarka RM132.7 juta.
“Sedarka pekara tu, aku enggau opis menteri pengerai deka mai siti akta baru ke parlimen dikena nagang aktiviti nginsap enggau ngempu sebarang produk insap nyengkaum ngagai rebak biak ada limpas taun 2005 ti dikumbai ‘generational end game’.
“Reti nya enti kita beumur 17 taun enggau parlimen ngemendarka akta tu, kita enda ulih agi meli sebatang insap di menua tu,” ku iya sepengudah bejadika program Hari Kanser Peringkat KKM nengah tali arus, lebuh Hari Empat.
Ba awak ke sama, Khairy madahka, kes riman di menua tu bisi nambah 11 peratus iya nya 115, 238 kes ungkup timpuh 2012 nyentuk 2016 dibanding enggau 103, 507 ba timpuh 2007 nyentuk 2011.
