KUCHING, 10 Feb: Apai indai dipinta lengkas nganjung anak sida betuchuk vaksin Covid-19 .
Sapit Kepala Menteri, Dato Sri Dr Sim Kui Hian madah, tuju tu dikena bejejaga ari kes covid-19 di Sarawak ti majak nambah diatu berindik ari pengekai varian omicron.
Dr Sim ke mega Menteri Pengerai Mensia Mayuh enggau Kaunsil Kandang Menua madah, betuchuk vaksin beguna amat dikena nyeliahka sida ari ngerampit raban ke berisiko tinggi.
“Taja empas varian omicron enda balat tang mengkang ulih meri penusah enti sema ngerampit raban ke berisiko tinggi.
“Nya kebuah beguna bendar betuchuk vaksin ngagai nembiak laban lebuh sida pulai ke rumah sida begulai enggau aki ini ti ulih meri risiko kena rampit. Nya kebuah vaksin tu beguna,”ku iya.
Iya mansutka jaku nya maya ngelawa ngagai klinik pengerai (KK) Batu Kawa begulai enggau Sapit Menteri Pengerai 1 Datuk Dr Noor Azmi Ghazali matau program betuchuk vaksin covid-19 nembiak mit (PICKIDS) kena Hari Empat.
Berebak enggau nya, Dr Sim beterima kasih enggau semua apai indai nyengkaum opis pengerai enggau opis pengajar ke udah ngelancharka program betuchuk vaksin nembiak mit 5 lima taun nyentuk 12 taun di Sarawak.
Ku iya madah, vaksin iya nya kompenan besai dikena dalam pengawa perintah nagang pengekai covid-19.
