KUCHING, 29 Jan: Niang Tuai Pemegai Menua ke lama, Tun Pehin Sri Datuk Patinggi Abang Muhammad Salahuddin Abang Barieng siku tuai ke patut nyadi teladan ngagai raban nembiak enggau tuai bukai kemaya hari, pia ku Sapit Kepala Menteri Lama Datuk Patinggi Tan Sri Alfred Jabu Numpang.
Iya madahka, niang Tun Salahuddin siku tuai ti ngembuan ulah ke manah, baruh ati, bebasaka semua orang sereta seruran meransang rayat pupu bansa di Sarawak bekerejasama ngemansangka negeri.
“Tun Abang Muhammad Salahuddin dua kali dichiri megai pangku pengawa nyadi Tuai Pemegai Menua negeri Sarawak.
“Tu mandangka niang nempa sejarah lebuh nyadi siku tuai ti keterubah megai pangku pengawa nya dua kali seraya mandangka iya endang siku tuai ke ulih diandalka lebih agi ngemeratka pengelantang rayat,” ku iya madah.
Tan Sri Alfred Jabu madahka, niang Tun Salahuddin kala gawa ba servis perintah enggau siku ari tuai ti nyukung penumbuh menua Malaysia ba taun 1963.
“Kelimpah ari nya, niang Tun Salahuddin siku tuai ke chukup kemerah, siru enggau ngemeratka pekara pelajar tetiap iku anak Sarawak,” ku iya madah agi.
Kena 22 Februari 2001, niang Tun Abang Muhammad Salahuddin sekali agi dichiri nyadi Tuai Pemegai Menua negeri Sarawak.
Niang lama megai pangku pengawa nya ba pun ari 28 Februari 2014 seraya nempa sejarah nyadi siku tuai ti keterubah di Sarawak dichiri megai pangku pengawa nya dua kali.
