KUCHING, 29 Jan: Sebedau tengah malam kemari, rayat negeri Sarawak nerima berita sinu, senentang Tuai Pemegai Menua ke lama, Tun Pehin Sri Datuk Patinggi Abang Muhammad Salahuddin Abang Barieng udah midang.
Berita nya dikunsika Wan Ibrahim Omar iya nya menantu niang Tun Abang Muhammad Salahuddin ke mega Tuai Pemegai Menua negeri Sarawak ketiga enggau keenam.
Niang Tun Abang Muhammad Salahuddin nempa sejarah lebuh nyadi siku tuai ti keterubah di Sarawak ke megai pangku pengawa nyadi Tuai Pemegai Menua dua kali.
Kelimpah ari nya, niang keterubah dipaduka nyadi Tuai Pemegai Menua kena 20 April 1977 nyentuk ke 1 April 1981 iya nya sepengelama tiga taun 345 hari.
Ba taun 2000, niang Tun Abang Muhammad Salahuddin megai pangku pengawa nyadi Tuai Pemegai Menua Sarawak maya Tun Datuk Patinggi Dr Ahmad Zaidi Adruce Muhammed Noor udah enda ulih agi bejalaika pengawa.
Kira – kira setaun udah nya, kena 22 Februari 2001, niang Tun Abang Muhammad Salahuddin sekali agi dichiri nyadi Tuai Pemegai Menua negeri Sarawak.
Niang lama megai pangku pengawa nya ba pun ari 28 Februari 2014 seraya nempa sejarah nyadi siku tuai ti keterubah di Sarawak ke dichiri megai pangku pengawa nya dua kali.
Niang Tun Abang Muhammad Salahuddin ada di Kampung Nangka, Sibu, kena 27 Ogos 1921.
Semina niang aja anak Abang Barieng bin Abang Anyut, siku tokoh ke pemadu dikelala enggau dipebasa mensia mayuh di Sibu.
