KUCHING, 28 Jan : Siku kitai Iban iya ke ngembuan pemandai sereta penau tau disempamaka baka nyaing muting geraji,tajam nyemilu tisi.
Dr Lambat Lindong, penerima Anugerah Pegawai Chunto lebuh Hari Perkhidmatan Awam Negeri Sarawak 2022 enda lama ke udah madahka kitai patut nerenak sereta ngembuan pengarap ke pengulih diri empu.
Dr Lambat Lindong iya nya Direktor Institut Pematih Pengajar (IPG) kampus Batu Lintang mujur bulih Anugerah Pegawai Chunto enda lama ke udah.
Ku iya, kitai enda tau enda bekenanas nyikap diri enggau penemu enggau pengelandik.
“Penemu enggau pengelandik ku aku nya ukai semina penemu enggau pengelandik dikena kitai gawa tang mega dikena kitai dalam aspek bukai ba pengidup nyengkaum kena kitai begulai, sereta bekereja enggau orang bukai dalam raban. Pia mega ngagai sida ke agi biak kelebih agi lebuh kitai ngereja sesebengkah pengawa ke diungkupka ngagai kitai, pengawa nya mesti dikereja kitai enggau pengabis penemu enggau pengelandik diri. Anang sekali-kali kitai empelita pengawa ke dikerejaka kitai”, ku iya.
Nangkan ke nya iya madahka kitai patut ngambat peneka enggau pelaba orang ke enggau kitai gawa enda ngira baik iya orang atas kitai, orang baruh tauka orang ke sama tikas pengawa enggau kitai.
Iya ke mega Presiden Gerempung Pemansang Pelajar Jaku Iban (Aedil) madahka kelimpah ari penemu enggau pengelandik kitai mega patut ngembuan ati enggau runding ke manah iya nya ati enggau runding ke positif.
“Kitai mega mesti bisi inisiatif ngereja pengawa lalu enda nganti orang ngasuh tauka ngansa kitai ngepun tauka ngereja sesebengkah pengawa nya. Nambahka nya mega kitai mesti sanggup ngereja pengawa ke lebih ari batang pengawa tauka agih pengawa ke diungkupka orang ngagai kitai. Orang ke ngereja pengawa baka tu endang deka dikerindu sereta dikesayauka orang ari atas kitai,” ku iya lebuh dikerandau pengarang berita TVS.
Kelimpah ari nya mega ku iya, kitai mesti besedia napi ubah ke nyadi ninting hari ba dunya ke ngelingi kitai pia mega ba dunya ke endur kitai gawa sereta ngembuan pengerindu belajarka pekara baru, chara baru, ngubah runding sereta neriti diri ngambika kitai ulih maju enggau ulih besemekih enggau orang bukai.
