KUCHING, 19 Jan: Taja pan penyampau kes ninting hari COVID-19 di Sarawak majak kurang, rayat dilalau terus bejejaga, ngasika Standard Atur Pengawa (SOP) sereta nyaga seraka fizikal.
Chairman Komiti Penyangga Penusah Ngenyit Negeri (JPBN) Sarawak, Datuk Amar Douglas Uggah Embas nyemetak madahka, tetiap iku rayat di negeri tu mesti ngembuan tanggungpengawa nyaga pengerai diri.
“Nengah chara nya kitai arapka Varian Omicron ke benung ngekai di serata dunya ulih ditagang di Sarawak.
“Naka ke diatu, penyampau kes COVID-19 ti dirikodka majak kurang.
“Kitai arapka pekara tu ulih diteruska,” ku Uggah madah.
Kelimpah ari nya, Uggah ke mega Sapit Kepala Menteri nerangka senentang pemujur tu dijapai ketegal rayat meri kerejasama ke manah enggau ngasika SOP ke udah ditetapka.
“Tetiap iku rayat sama bejalaika pekara ke patut dikena nentuka pengerai enggau pengelikun sida seruran tejaga.
“Nya alai, aku endang arapka kitai sama terus besaup ngemunaska pengekai COVID-19 awakka kitai ulih bejalaika pengidup ninting hari baka sebedau tu,” ku iya madah agi.
Iya madahka, menua diatu udah berengkah ngalih ke renggat keempat Pelan Pemulihan Negara (PPN), rayat dipeda nadai penanggul pansut ari rumah, bejalai ba sebelah kedai sereta ngatur pengawa ke sebedau tu ditagang.
