KUCHING, 5 Disember: Gabungan Parti Sarawak (GPS) beentaruhka chalun baru enggau biak ke beumur entara 30 nyentuk40 taun ba Pengawa Bepilih Nengeri Sarawak Ke-12 (PRN-12) ti dipelabaka nerima sambut ti manah ari rayat.
Penganalisis Politik Sarawak, Dick Lembang Dungun madah, tu deka meri empas ngagai landskap politik Sarawak.
Ku iya madah, di Sitak Kunsil Nengeri (DUN) Tanjong Datu ti mantaika chalun pemadu biak iya nya anak niang Tok Nan, Azizul Annuar Adenan, 30 enggau chalun di DUN Lingga, Dayang Noorazah Awang Sohor 33, iya pechaya sida diterima rayat ba sitak nya empu.
“ Aku pechaya penatai sida ti dipeda dalam kitai beratika gaya baka ni chalun baru tauka mua baru tu meri empas ba landskap politik Sarawak, tu bepanggai ba penatai chalun tu empu.
“Rayat Sarawak nadai penanggul nerima chalun biak ti dibantaika GPS baka di Tanjong Datu enggau di Lingga enggau sida deka terus nyukung chalun tu ila,”ku iya lebuh dirandau pengarang berita kena Hari Enam.
Berebak enggau nya, Dick pechaya dalam timpuh lima taun ti deka datai, ba pengawa bepilih nengeri Sarawak dijangka deka mayuh agi chalun ari raban biak dipilih nyadi chalun.
Ku iya madah, tu deka nempa kaul entara orang biak enggau senior dalam ngaga polisi sereta semua pengawa ke guna Sarawak dudi hari ila.
