MIRI: Sebuah Balai Bomba enggau Penyelamat (BBP) benung digaga di Batu Satu, Kuala Baram ti dijangka tembu bulan Februari taun baru.
Menteri Perengka Pengangkut Sarawak, Dato Sri Lee Kim Shin madah, pengawa ngaga BBP Bomba Kuala Baram diatu udah manggai 90 peratus tembu ti beungkus sepenyampau RM6.6 juta.
“Ba taun 2014, aku udah minta sebuah balai bomba digaga ba utara mengeri Miri dikena nentuka pengawa bekaul penusah angus lengkas dipejalaika ke alai BBP ke bisi diatu jauh ari Kuala Baram,”ku iya dalam laman facebook iya kemari.
Ku iya madah, penembu BBP tu ila deka ulih meri servis mungkur Kuala Baram nyentuk Tudan.
Ba balai bomba Kuala Baram tu mega bisi 32 iku raban bomba nyengkaum bomba bantuan enggau sebuah perengka pengangkut nyengkaum disikap enggau kereban madamkan api.
Ku iya madah, balai bomba tu beguna bendar laban kandang menua tu suah napi penusah angus tanah kerapa ti nyadi nyau ninting taun lebuh musim kemarau.
Sama bisi datai maya penemuai iya ngagai balai bomba Kuala Baram tu iya nya Tuai Opis BBP Malaysia Zon 6 Miri, Penguasa Kanan Bomba I Law Poh Kiong.
