MIRI, 25 Nov: Datuk Gerawat Gala deka terus ngetanka kerusi Kunsil Nengeri (DUN) Mulu ba Pengawa Bepilih Nengeri (PRN) Sarawak Ke-12 tu ila.
Kepala Menteri Datuk Patinggi Tan Sri Abang Johari Tun Openg ke mega Chairman Gabungan Parti Sarawak (GPS) madahka, Kaban Kunsil Negeri (ADUN) Mulu Lama, Datuk Gerawat Gala deka nyadi chalun ngetanka kerusi di sitak nya.
Iya pechaya kerejasama entara Datuk Gerawat enggau Kaban Parlimen Baram Anyi Ngau deka nentuka sitak Mulu deka terus nerima pemansang.
“Enti kita milih GPS endang GPS udah bejalaika pengawa enggau chukup manah.
“Kaban Parlimen kita, pengari rayat kita, lima taun beri kuasa baru jalan alun bisi, Mulu deka terus dikemansangka enggau ekonomi pan nambah,” ku iya madah.
Iya nerangka, nengah Ejensi Pemansang Tanah Tinggi (HDA) perintah Sarawak ulih ngemansangka DUN Mulu nguna chara ke lebih berurun sereta strategik.
“Lebih agi Mulu udah diangkat nyadi sub pelilih sereta Pegawai Tadbir Sarawak (SDO) ke agi biak sereta ransing gawa. Kitai deka terus ngemansangka kandang menua tu. Aku pechaya kita bisi perambu dikena ngemansangka Mulu,” ku iya nambah.
Beduduk ari nya, Abang Johari nyemetak madahka, enti sema rayat meri mandat baru ngagai GPS nyadi perintah Sarawak iya deka bebendar agi ngiga chara bukai dikena nambahka asil penatai pemisi nengeri ungkup pemansang di nengeri tu.
“Aku pechaya Mulu deka terus nerima pemansang. Tu meri pemaik ngagai rayat ba ditu lebih agi ba sekeda genturung pendiau ke udah bisi ti nyengkaum nerima bekal karan.
“Mar ungkus dikena ngaga projek bekal karan SARES. Nadai nengeri bukai kelimpah ari GPS bejalaika program baka tu. Bekal ai SAWAS kitai nguna RM4 bilion. Aku berani bejalaika pengawa tu laban aku udah ngira semua belanja,” ku Abang Johari madah agi.
Iya mansutka jaku nya lebuh ngelancharka Palan Servis Mulu lebuh Hari Empat.
Penumbuh palan servis enggau penembu jalai dalam timpuh lima taun ti deka datai dikearapka mantu muka peluang ekonomi di sitak nya.
