KUCHING, 24 Nov: Komiti Pengawa Bepilih Besai Malaysia (SPR) netapka 18 Disember 2021 hari bulan ngundi ungkup Pengawa Bepilih Nengeri (PRN) Sarawak ke-12.
Chairman SPR Datuk Abdul Ghani Salleh sehari tu madahka, hari bulan ngirai nama chalun ungkup pengawa bepilih kena 6 Disember seraya pengawa ngundi tumu kena 14 Disember 2021.
Pekara nya dipadahka Abdul Ghani rambau aum pengarang berita sepengudah bechairmanka aum khas SPR bekaul enggau PRN Sarawak lebuh Hari Tiga.
Sebedau tu, SPR enda ulih ngemendarka PRN Sarawak diatur sepengudah timpuh Kunsil Nengeri (DUN) abis kena 6 Jun 2021 ke udah berindik ari perintah darurat ti ditukuka di serata menua.
Yang di-Pertuan Agong Al-Sultan Abdullah Ri’ayatuddin Al-Mustafa Billah Shah ngenukuka darurat di serata menua kena 11 Januari nyentuk ke 1 Ogos 2021, ti mai tuju dikena nagang pengekai igi penyakit COVID-19.
Nangkan ke nya, iya madahka, SPR nyaran 70 peratus pengundi deka ngundi beserimbai enggau PRN Sarawak ke-12.
“SPR mega minta kerejasama ari semua ti nyengkaum raban media, parti politik bejalaika chara ke patut meransang pengundi nurun ngundi.
“SPR deka bejalaika kimpin ‘Jom Kita Undi’ nengah pelantar media sekalika media elektronik, media rama, broadcast enggau ngitau banner ba sekeda endur ke strategik ti nyengkaum palan ke suah dilawa mensia mayuh,” ku iya madah.
Kelimpah ari nya, iya nerangka senentang Garis Lalu Dikena Nagang Pengekai COVID-19 ungkup PRN DUN Sarawak Ke-12 diatu benung dikemanahka Opis Menteri Pengerai Malaysia (KKM), Kaunsil Pengelikun Menua (MKN), Polis Diraja Malaysia (PDRM) enggau Komiti Mutarka Penusah Ngenyit Nengeri (JPBN) Sarawak lalu deka dipadahka enda lama agi.
