KUCHING, 21 Nov: Projek Jematan Sungai Sarawak di Sejingkat enggau Projek Jalai Alun Kedua Kuching-Samarahan deka nyadi kelai baru pemansang di mengeri Kuching enggau Samarahan seraya ulih ngelancharka pejalai kerita ba kedua-dua endur nya.
Ku Menteri Muda Infrastrakcha Enggau Pemansang Penyangkai Kapal, Datuk Julaihi Narawi madah, projek ke beungkus RM370 juta tu dijangka tembu manggai taun 2025 sereta dipelanja seratus peratus perintah nengeri Sarawak.
“Keterubah, pakej 3A ngaul pengawa jematan nyemerai Sungai Sarawak di Sejingkat enggau Tanjung Bako sepemanjai 1.2 kilometer bansa “Cable Stay”. Projek tu dijangka tembu dalam timpuh 48 bulan.
“Pakej kedua 3B ngaul pengawa ngaga jalai ba seberai Bako iya nya ngangkatmanah jalai nuju ILP enggau Tanjung Paku. Pengawa ngangkatmanah tu ngaul jalai alun ti deka dikemesaika ngagai standard Opis Kereja Raya (JKR) iya nya R5. Projek tu dijangka tembu dalam timpuh 24 bulan,” ku iya madah.
Kelimpah ari nya, siti agi pakej ba baruh projek tu iya nya Pakej 3C ti ngaul pengawa ngaga jalai alun ba mua ke belakang iya nya nuju jematan Batang Samarahan.
Ku iya madah, sida ke datai ari Jematan Samarahan enda ibuh nengah jalai UNIMAS tang terus nguna jalai ke baru tu nuju ke ILP enggau Sejingkat.
Iya mansutka jaku nya lebuh bejadika Pengerami Nasih Tanah Jematan Sungai Sarawak di Sejingkat enggau Projek Jalai Kedua Kuching-Samarahan lebuh Hari Minggu.
Projek tu lama udah dirandaka peranak ba Samarahan enggau Kuching .
Berindik ari nya, perintah bejalaika inisiatif dipejalaika nguna agih belanja penuh ari perintah nengeri Sarawak dikena ngurangka penyekut bajalai tebal agi ba jam orang nurun kereja muak ke pagi enggau lemai hari.
Nangkanka nya, Julaihi madahka projek tu dikena mandakka timpuh pejalai ari kedua-dua endur iya nya Kuching-Samarahan sereta ulih nyadi penyambung entara sektor industri ba endur nya.
“Projek tu ulih nyadi jalai alun ti nyambung semua sektor industri kilang enggau industri berat ba Kuching enggau Samarahan nengah Pending Industrial Estate, Demak Laut Industrial Park enggau Samajaya Free Industrial Zone,” ku iya madah agi.
Iya madahka, Samarahan diatu nyadi siti ari pelilih ke ulih mai penatai pemisi ungkup nengeri tu ketegal mayuh pemansang sereta industri benung chakah dipejalaika sereta dikemansangka.
Pia mega, penumbuh projek tu ulih nyungkak pemansang di samarahan ari sukut sektor betanam betupi, dagang temuai sereta pemansang infrastrakcha ke bukai.
