KUCHING, 21 Nov: Pemisi jematan ke udah tembu digaga enggau benung digaga perintah di serata Sarawak mantu muka pemansang ekonomi ba sesebengkah endur tauka kandang menua.
Kepala Menteri Datuk Patinggi Tan Sri Abang Johari Tun Openg nyemetak madahka tetiap jematan ke digaga deka muka tanah ungkup pengawa ekonomi, sektor betanam betupi, palan berumah, chara pengidup ke baru, sektor dagang temuai sereta ngemesaika pengawa dagang ke udah bisi.
Beduduk ari nya, iya nerangka senentang semua pemansang infrastrakcha ke udah digaga perintah mesti meri bekau ke manah ngagai pengidup rayat ngambika projek ke udah tembu nya ulih matak pemansang bukai ke bekaul.
Ku Abang Johari madah, nya entara pekara ke dipejalaika enggau deka terus dikerembaika perintah Gabungan Parti Sarawak (GPS) ti seruran ngemeratka pemansang infrastrakcha sekalika di mengeri tauka di menua pesisir.
“Arapka manggai taun 2030 ekonomi nengeri kitai udah bisi tuju sepengudah COVID-19. Kitai deka terus nambahka tikas ekonomi kitai ti nyadi sebuah nengeri ke maju sereta bepenatai tinggi.
“Kitai mesti nemunama pemanah ke dibai asil ari pemisi jematan tu ngemudahka kitai nurun enggau nikal pulai, kitai deka muka tanah ba seberai tu dikena projek palan berumah baru tauka numbuhka palan dagang enggau industri ba kandang endur tu,” ku iya madah.
Iya mansutka jaku nya lebuh bejadika Pengerami Nasih Tanah Jematan Sungai Sarawak di Sejingkat enggau Projek Jalai Kedua Kuching-Samarahan lebuh Hari Minggu.
