MIRI, 20 NOVEMBER : Burung Puk ti lebih dikelala Burung Puk Pending Pandak tauka nama saintifik iya ‘Asio Flammeus’ ti jarang ditemu ba kampung Sarawak mujur diselamatka Opis Kampung Sarawak (SFC) lebuh hari Enam.
Ku SFC madah ba dalam siti penerang, Burung Puk nya diserahka siku peranak di Miri ngagai sida.
Ku penerang nya madah, Burung Puk nya deka dilepaska baru ba kampung sepengudah diperubat.
Entudika nya, Burung Puk nya siti spesis tauka bansa burung ti dijaga ba baruh Ordinan Nyaga Jelu Siga 1998.
Ba awak ke sama, Tuai Pegawai Eksekutif (CEO) SFC Zolkipli Mohamad Aton beterima kasih ngagai mensia mayuh laban udah nulung sida nyaga jelu siga baka tu.
“Spesis tu jarang ditemu sereta nadai mayuh rikod senentang Burung Puk tu di Sarawak,”ku iya nambah agi.
Iya nyemetak ngelalau mensia mayuh ti bisi tetemuka tauka bisi penerang senentang burung puk tauka jelu siga ke bukai tau betelefon ngagai opis SFC nengah lumur Kuching (019-8859996), Sibu (019-8883561), Bintulu (019-8332737) enggau Miri (019-8290994).
