KUCHING, 19 Nov: Pengawa nyaga sereta ngemeranka pemanah seni enggau main asal di Sarawak udah berengkah ngalih ke digital enggau nguna chara dalam tali arus.
Tu seriran enggau pemansang teknologi kemaya hari ti diguna ba dalam sesebengkah organisasyen sekalika ba sektor perintah tauka sektor peribit.
Ku Direktor Opis Budaya enggau Seni Menua (JKKN) Nengeri Sarawak, Noor Seela Noor Sulaiman madah, JKKN diatu udah nguna dokumentasyen digital ti nyengkaum ba pengawa gambar tauka video ke digaga jkkn ti nguna virtual system.
Pia mega, iya madahka JKKN deka ngemesaika agi chara ke sama ba sekeda kereban ke diguna ba pengawa pansik, keretas kereja, transkrip enggau ke bukai ti dibantai tiki ba dalam dokumentasyen digital.
“Kelimpah ari nya, semua orang nemu kitai diatu udah bisi laman web kediri empu. JKKN udah ngemansangka laman web “Cultural Mapping” ke nyadi palan ngumpul penerang senentang seni enggau main asal Malaysia ukai semina di Sarawak aja.
“Nguna laman web ke lebih komprehensif semina ba ujung jari. Ambika chunto, enti kitai ba Amerika Syarikat pan ulih ngiga penerang ke bekaul nengah pemetaanbudaya.my,” ku iya madah.
Iya madahka, JKKN diatu benung ngemanahka agi laman web nya ti nyengkaum ngemasukka penerang ke lebih engkeman sereta silik agi baka nyendiaka gambar enggau video ke ngembuan kualiti ke lebih manah.
Noor Seela mega nerangka, senentang chara dokumentasyen digital mantu JKKN nyaga sereta ngemeranka pemanah seni enggau main asal di menua tu ke ulih dimalin raban nembiak redak.
“Berindik ari nya, JKKN seruran bebendar meri penerang ngagai mensia mayuh senentang seni enggau main asal menua lebih agi di Sarawak.
“Sepemanjai timpuh COVID-19, JKKN bisi ngatur program nengah chara dalam tali arus ti nguna media rama ke udah bisi baka nguna Facebook JKKN Sarawak, Facebook JKKN TV ke udah dikemansangka indu opis JKKN,” ku Noor Seela madah agi.
Iya mansutka jaku nya lebuh dirandau ba dalam program Sejahtera Asia TVS sehari tu senentang pengawa nyaga pemanah seni enggau main asal di Sarawak.
