KUALA LUMPUR, 18 Nov: Pengawa netapka rega dikena ngulihka tiga spektrum ungkup bejalaika program bungkur 5G di menua tu iya nya nengah pengawa berunding Kaunsil Komunikasyen enggau Multimedia Malaysia (MCMC) ti nguna chara ‘Tawaran Akses Rujukan’ tauka RAO.
Menteri Komunikasyen enggau Multimedia, Tan Sri Annuar Musa madahka, chara nya dikena nentuka rayat enda mayar rega bungkur 5G ti kelalu mar enti sema 5G tu dipejalaika ba pun bulan 12 taun tu.
“Ukai DNB (Digital National Berhad) ke ulih ngeletak rega ti tinggi udah nya diberi ngagai MNO (Mobile Network Operator) tauka MNO ulih ngambi nengah rega ke ulih ditetapka sida.
“Pengawa berunding RAO tu benung dipejalaika sereta semina sepengudah rega ROA tu ditetapka baru 5G ulih disain nengah pemendar ari MCMC lalu diatu, MCMC bedau meri pemendar ba pengawa netapka rega spektrum,” ku Annuar madah.
Berebak ari nya, Annuar nerangka, senentang pengawa tu enda nguna konsep borong dikena nagang rega ti kelalu mar dibayar tetiap iku penguna ke ngena servis nya.
Pia mega, enti sema pengulih spektrum nya diambi nengah konsep lelong, nya deka meri empas ngagai penguna laban enti sema rega lelong kelalu tinggi, penguna deka mayar cas bungkur 5G ke lebih mar agi.
Iya munyi nya maya nyaut tanya ari Kaban Parlimen Lembah Pantai, Ahmad Fahmi Mohamed Fadzil ti deka nemu penyampau asil penatai perintah ke telepas ti dibanding nguna ‘option off’ spektrum ke diberi terus ngagai serikat telekomunikasyen dikena ngalih ari bungkur 4G ke 5G ba aum Dewan Rakyat lebuh Hari Empat.
