Gedong, 17 Nov: Kepala Menteri Datuk Patinggi Tan Sri Abang Johari Tun Openg deka berunding sekalika deka terus ngetanka kerusi Kunsil Nengeri (DUN) Satok tauka ngalih ngagai DUN gedong lebuh pengawa bepilih nengeri (PRN) Sarawak ke-12 tu ila.
Iya bejaku munyi nya ketegal Datuk Mohd Naroden Majais ke sebedau tu nyadi ADUN Gedong diatu ngasuh kepala menteri nya betanding ngarika sitak nya.
Tu berindik ari pemutus Naroden enda agi ngetanka kerusi nya lebuh PRN tu ila.
“Aku deka berundingka senentang pekara tu. Meda gaya dulu. Bisi maya ila aku deka madahka pemutus.
“Entara kebuah Datuk Naroden ngasuh aku ngarika sitak tu laban iya deka meda pelilih tu mansang agi lalu tu begunaka belanja ti besai,” ku iya lebuh bejaku ba pengawa nasih tanah jalai Teranggas Gedong lebuh Hari Tiga.
Sebedau tu Naroden meri awak enti sema Abang Johari deka nyadi ADUN 26 Gedong ba PRN Sarawak ti deka datai dikena ngemansangka agi DUN Gedong.
Tu berindik ari semina kepala menteri aja bisi kuasa ngungkupka agih belanja dikena mai pemansang ba sitak nya jemah ila.
