MIRI, 17 Nov: Perintah Sarawak nengah Opis Menteri Utiliti (MOU) udah ngaga perambu ke silik enggau nyendiaka agih belanja ke besai dikena nentuka bekal ai di serata Sarawak ulih nyapai bungkur 100 peratus manggai taun 2025.
Ku Menteri Utiliti Datuk Seri Dr Stephen Rundi Utom madah, opis menteri nya udah ngungkupka RM8.28 bilion dikena bejalaika 606 projek pemansang bekal ai di serata nengeri Sarawak ba timpuh ari 2017 nyentuk ke 2021.
Iya madahka, nengah semua projek pemansang nya nguna dua strategi iya nya Sistem Grid Bekal Air enggau Program Bekal Air Alternatif Sarawak (SAWAS).
“Naka ke diatu, 231 projek udah tembu, 227 agi benung digaga enggau 148 projek agi ba renggat perambu.
“Projek bekal ai dilanggur enggau diperatika silik seraya nguna belanja ke chukup besai dikena nentuka visyen MOU ulih nyapai 100 peratus bungkur bekal ai ulih dipejalaika manggai taun 2025,” ku iya madah lebuh ditanya pengarang berita Bernama.
Kelimpah ari nya, naka ke diatu bungkur bekal ai beresi di serata Sarawak udah nyapai 83.4 peratus ti mungkur 99 peratus genturung pendiau di mengeri seraya 66.5 peratus di kandang menua pesisir.
Dr Stephen Rundi madahka, pelin besai Sistem Grid Bekal Ai udah digaga nitihka zon lalu Zon Selatan ba baruh kemata Kaunsil Kuching (KWB), Zon Tengah ba baruh kemata Kaunsil Ai Sibu enggau Zon Utara ba baruh kemata Kaunsil Ai Kandang Menua Utara (LAKU).
