KUCHING: Bisi 15 projek sakit di Sabah enggau Sarawak diketuka kunterik enggau deka diserah ngagai kunteriktor penembu projek.
Projek tu nyengkaum projek ngaga Sepital Petra Jaya di Sarawak ti tebengkalai sebedau tu.
Menteri Kanan Kereja Raya, Datuk Seri Fadillah Yusof madah, konsep kunteriktor penembu projek iya nya bejalaika projek ti enda ulih ditembuka ketegal penanggul kunteriktor enggau ke bukai.
Ku iya madah, chara tu dipejalaika ba raban kunteriktor penembu projek ti udah dikemendarka enggau diberi setipikit kunteriktor penembu projek Opis Menteri Kereja Raya (KKR).
Nya kebuah atur tu diguna ungkup semua projek ti dipejalaika perintah.
“Naka ke diatu, perintah udah ngemanahka atur sentang penyiri kunteriktor Penembu Projek enggau ngetuka chara ngulihka tinda betatak lalu ngantika enggau chara tinda tebuka,” ku iya maya pengerami Nasih Tanah Projek Ngaga Jalai Ngagai Selatan Padang Bilun Kuching (KIA) kena Hari Enam.
Ku iya sesebangkah projek kadang-kadang napi penanggul ngujungka projek nya nyadi projek sakit ke alai kunterik ngaga projek ulih diketuka.
Tu komitmen KKR dalam nentuka semua projek ti dipejalaika perintah sekalika ba renggat nengeri enggau perintah besai bejalai lanchar sereta nitihka timpuh ti udah ditetapka nyengkaum ba pekara bajet.
