SRI AMAN: Menteri Muda Pengelantang Komuniti, Datuk Francis Harden Hollis bejadika pengawa nyerahka taba Projek Transformasyen Menua Pesisir (RTP) ngagai kunteriktor ti bejalaika projek nya.
Projek RTP tu sebagi ari projek ti dipelanja perintah nengeri Sarawak ke pengelantang peranak di sitak Kunsil Nengeri (DUN) Simanggang.
Harden ke mega Kaban Kunsil Nengeri (ADUN) Simanggang madah, projek RTP tu mungkur projek ngangkat manah Dataran Kejat, Rumah Panjai Rumah Belai, Kampung Berangan Ili, Skrang enggau Projek Ngemanahka Dataran Kejat Rumah Thomas, Kampung Brangan Ulu, Skrang.
“Projek ti dirandaka peranak rumah panjai tu iya nya projek perintah nengeri Sarawak. Rayat patut meda perambu pemansang ti majak dipejalaika enggau patut beterima kasih ke pemanah perintah,”ku iya dalam siti penerang.
Ku iya madah, projek pemansang ti dibai perintah ukai semina retorik laban perintah endang ngemeratka pengelantang rayat dalam konsep Sarawakku Sayang.
Berebak enggau nya, iya ngelalau tuai rumah enggau tuai bansa bejalaika tanggungpengawa nerangka polisi perintah ti deka nyerakupka rayat laban tuai rumah jematan entara perintah enggau rayat.
Sama bisi datai ba program tu iya nya Cr Andar Suntai, Cr Denneil Saweng, Cr Waterkiller James Junit, Cr Lansing Bansi enggau Kapitan Ling Siew Hung.
