KUCHING, 12 Nov: Pemisi Universiti Teknologi Sarawak (UTS) iya nya sebuah universiti ke dipenggi Perintah Sarawak bejalaika tanggungpengawa ke beguna ti mekuhka pengawa pansik enggau inovasyen ba dalam pemansang rayat di nengeri tu.
Tu seriran enggau juluk Sarawak deka nyapai status nengeri maju manggai taun 2030 lebih agi seriris enggau visyen ekonomi digital ti suah dikemeratka Kepala Menteri Datuk Patinggi Abang Johari Tun Openg.
Ku Chairman UTS, Dr Annuar Rapaee madah, perintah Sarawak udah bejalaika inisiatif mantaika insentif ngagai raban nembiak ke nampung pelajar di UTS ti nyengkaum UTS Foundation Scholarship, Skim Bursari UTS, Sekularship Pra Siswazah enggau Pasca Siswazah sereta bantu duit ke bukai.
“Kitai deka mayuh anak Sarawak ulih nampung pelajar sida ke tikas lebih tinggi di UTS enda ngira bansa enggau batang pengarap.
“Aku minta anak-anak Sarawak nguna manah peluang tu sereta nadai agi dalih enda ulih nampung pelajar ke tikas lebih tinggi.
‘Seagi kita bisi ati tauka juluk deka belajar kita ulih nguji nampung pelajar ba UTS sekalika kita anak Bumiputera tauka ukai anak Bumiputera,” ku Dr Annuar madah ba Facebook iya empu lebuh Hari Empat.
Dr Annuar ke mega Menteri Muda Pelajar, Sains enggau Pansik Teknologi nyemetak madahka, Perintah Sarawak numbuhka UTS tu ungkup semua anak Sarawak enda ngira sida ke mendam di mengeri enggau menua pesisir.
Sebedau tu, lebuh ngelancharka UTS apin lama ke udah, Kepala Menteri Datuk Patinggi Abang Johari Tun Openg madahka, perintah nengeri deka meri komitmen nyendiaka bantu belanja enggau sekularship pelajar ti nyadika sukung ungkup operasyen sereta bantu duit universiti.
UTS deka mantu Sarawak nempa raban graduet ungkup ekonomi digital jemah ila ti ulih besemekih seraya nempa raban nembiak ke pintar nguna masa teknologi enggau digital.
