KUCHING, 12 Nov: Ekonomi nengeri Sarawak ngerikodka penumbuh ke sedang taja pan betapi enggau gaya global ke enda tentu ba dalam timpuh Perambu Malaysia Lumpar Ke-11 (RMK11).
Ku Sekretari Perintah Nengeri Datuk Amar Jaul Samion madahka, sektor servis enggau begagaka barang nyadi entara sektor ke mayuh nambahka asil penatai ekonomi nengeri.
Iya madahka, taja pan semua sektor agi betapi enggau pemar ti ngeruga daya deka nyapai potensi penuh sereta napi pemar lebih agi ngaul teknologi, daya semekih, akses makit sereta chara pengatur.
“Menua kitai mesti pulai manah ari pandemik COVID-19 lalu diatu kitai begunaka pengawa ke proaktif dikena ngeranchakka pemansang ekonomi menua enggau pengelantang rayat,” ku Jaul madah.
Iya mansutka jaku nya lebuh bejadika Forum Amalan Baik Peraturan (GRP) Sarawak 2021 ba Perbadanan Produktiviti Malaysia (MPC) Sarawak nengah aplikasyen zoom lebuh Hari Empat.
Ku Jaul madah, pandemik COVID-19 ke nuntung menua dalam timpuh dua taun tu endang meri pemar ngagai semua sektor ti nyerangkung Servis Perintah Nengeri Sarawak (Pans).
Taja pan pia, iya madahka pemar pandemik nya mesti diambi nyadika peluang ungkup pekereja perintah di Pansa ngembuan chara berunding ke kreatif, kritis enggau konstruktif.
Kelimpah ari nya, iya madahka Perintah Sarawak udah ngelancharka Strategi Pemansang COVID-19 (PCDS) 2030 ba bulan Julai ke udah.
Iya nerangka, senentang mayuh macham strategi udah dilanggur ba dalam PCDS 2030 dikena nyapai aspirasyen Sarawak ti deka nyadi sebuah nengeri maju manggai taun 2030 ti bepelasarka data enggau inovasyen.
“Asil ari nya ila ulih diasaika semua rayat di serata nengeri tu seraya ulih nyamin tauka nentuka pengawa ngalau enggau nyaga rampa menua sereta ekonomi ke lebih teguh,” ku iya madah agi.
