PADAWAN: Kaban Parlimen Puncak Borneo, Datuk Willie Mongin nyukung penuh sesapa aja chalun ari Gabungan Parti Sarawak GPS ti bepilih ba Pengawa Bepilih Nengeri (PRN) ke-12 kelak.
Ku iya madah, iya mega nadai penanggul bekerejasama enggau GPS laban ba iya GPS iya nya kaban politik ti suah mantu rayat.
“Enti kitai bisi kuda ke ulih tegar belanda enggau menang, nama kebuah kitai deka nukar kuda kitai, enti bisi angsa emas yang boleh betelur emas, dikena mantu rayat, nyaga pengelantang rayat, mai pemansang enggau mantu nengeri kitai ba pemansang ke baru, kitai patut berundingka meri sukung,” ku iya maya Program Jelajah Agrikomoditi #KeluargaMalaysia ti diatur Opis Menteri Ladang enggau Komoditi (KPPK), kena Hari Lima.
Ku iya nambah nambah, Sarawak mesti bisi perintah ti tegap ngambika ulih mekuhka pengawa pemansang nengeri ti meri pemaik ke pengelantang rayat.
Iya mega madahka diri enda enggau bepilih ba renggat kunsil nengeri (DUN) enggau ngarap chalun ke bepilih ulih mai pemansang ke rayat lebih agi di sitak Puncak Borneo.
“Aku udah madah ngagai semua pengundi meri sukung ti enda bebelah bagi ngagai sida. Tu laban kitai kala napi gaya politik ti enda manah maya pegai perintah besai ke alai sebedau tu kitai betukar perintah enggau menteri besai tiga kali, nyadi endang patut nentuka perintah nengeri tegap,” ku iya.
Ke rikod, ba PRN Sarawak Ke-11, Willie bepilih tiga penjuru di kerusi DUN Mambong nyadi chalun PKR ngelaban Datuk Dr Jerip Susil ke maya nya nyadi chalun Barisan Nasional enggau chalun ari DAP , Sanjan Daik.
