DEBAK, 5 Nov: Rayat ba sitak Kunsil Nengeri (DUN) Saribas dipinta meri baru mandat ngagai Gabungan Parti Sarawak (GPS).
Kaban Kunsil Nengeri (ADUN) Saribas Mohd Razi Sitam madahka, iya pechaya GPS deka mai mayuh agi pemanah ba sitak nya jemah ila ungkup pengelantang rayat ke mendam dia.
“Perintah GPS negeri ia nya perintah ba baruh iring tuai ari nengeri tu empu sereta ari parti politik di nengeri tu.
“Baka ke ditemu kitai, GPS bebendar deka ngambi pulai kuasa ngempu nengeri ba baruh Sempekat Malaysia 1963 (MA63) ti enda ditegika sebedau tu,” ku iya madah.
Ku Mohd Razi agi, Kepala Menteri Datuk Patinggi Abang Johari Tun Openg enggau raban kabinet iya udah mujur mai mayuh pemansang ngagai serata nengeri tu.
“Aku pechaya sida ba dalam penuduk ti tegap deka mai sereta bejalaika mayuh agi pemansang di nengeri Sarawak jemah ila.
“Berindik ari nya, GPS patut bulih sukung ari kitai nengah keretas undi,” ku iya madah lebuh ngulu program randau begulai enggau rayat ba Rumah Legum di Serugup lebuh Hari Empat.
Iya meransang rayat ngambika meri peluang ngagai semua chalun GPS nyapai pemujur besai ungkup pengelantang rayat enggau nengeri tu. – TVS
