KUCHING: Siku nembiak mit ke beumur 3 taun entara 21 iku peranak menua luar nadai pemendar (PATI) diburu pulai pengudah nguji tama ke Sarawak nengah jalai chit.
Markas Divisyen Pertama Infantri Malaysia dalam siti penerang madahka, semua PATI tu tama nengah jalai chit ba endur ke bebida iya nya di Kandaie enggau Lubok Antu.
Asil ari tasat, PATI ke beumur entara 17 nyentuk 55 taun nadai ngembuan sebarang dokumen pejalai ke sah enggau tuju tama ke garis entara menua Malaysia ketegal ngiga asil kampung.
Empat PATI ditemu bejalai kaki tama ngena jalai chit di Kandaie urung 100 meter ari ba garis entara menua Malaysia pukul 1.50 lemai kemari.
Nangkanka nya, di Lubok Antu, 17 iku PATI ditemu tama ke Sarawak urung 100 meter ari Indonesia pukul 7 pagi tadi.
Nitihka penerang, semua pati ti nyengkaum siku beumur 3 taun nadai dokumen pejalai ke sah tama ke nengeri tu.
Berebak enggau nya, Soldadu Darat lebih agi raban ke gawa nyaga garis entara menua Sarawak-Kalimantang Barat seruran nyikap diri nyaga pengelikun nengah inisiatif OP Benteng dikena nyeliahka sebarang risiko penama PATI ti ulih mai ba pengekai igi penyakit Covid-19.
