LAWAS: Kepala Menteri Sarawak, Datuk Patinggi Abang Johari Tun Openg mega ngasaika pengelenyau Niang Tan Sri Dr James Jemut Masing ti disahka udah nadai ba Pusat Perubatan Normah, Petra Jaya, pagi tadi.
Ku iya madah, niang mayuh mai pemansang sepemanjai iya nyadi pengari rayat lebih agi ngangkatka bansa Dayak di Sarawak.
“Iya siku kaban ti mayuh mantu bejalaika pengawa ke rayat. Aku berasai sinu enggau pemidang iya. Aku ngasai pengelenyau besai lalu nyadi kaban aku ngenataika penyinu ati ngagai sida niang sebilik,” ku iya pengudah ngelancharka program Sarawak Linking Urban, Rural and Nation (SALURAN-MYSRBN) Kampung Tengah di Trusan, Lawas, kena Hari Minggu.
Ku iya madah, masing siku ketuai ti siru ke rayat enggau seruran beratka nasit rayat.
Masing ke mega Presiden Parti Rayat Sarawak (PRS) keterubah ngaul diri ba pengawa politik nyereta parti bansa Dayak Sarawak (PBDS) sebedau numbuhka PRS ba taun 2004.
Kaban Kunsil Nengeri (ADUN) Baleh nya mega mujur ngetanka kerusi DUN Baleh pengelama lapan penggal bejurut sebedau dichiri nyadi Sapit Kepala Menteri sarawak kena 23 Januari 2017.
